Tasmania

13.3.13: De hets gheisse ab nach Tasmania (Hobart) chli kaputt acho aber schösch het aues klappet! De hemer ergend eine gfragt öber üs metnemt u lue do är het üs met i d’Stadt gno, so chame gäut spare ;) De simer is Infocenter wasme dert aues cha mache u isch so chli me het nid viu chöne ga luege, si hei nur es rise Artmuseum wome meter fähre cha häre ga u das hemer de o gmacht :) Zersch hemer dr Backpack ines Backpacker brocht wöumer dänkt hei mer miesse weder zrüg u de het die gschrebe womer couchsurfe dasi üs gd bim Museum cha cho hole u de hemer dr Backpack weder miesse hole, d’Fähri umbueche u de ischs de endli los gange, bi scho nume vo düm tod kaputt gsi u scheiss wätter hemer o no gha, vou chaut gsi ufder fähri. Vordra hemer no imne Park z’Mittag gässe u d’Sache kouft für d’Röschti da mer choche für se ;) De simer ca. 2-3h i däm Museum gsi, isch no rächt gross gsi u nid mou so schlächt. De simer soo mied gsi u hei no chli miesse warte bis si chunt de simer gd chli ipennt dert uf somne Sofa^^ De ischsi üs cho hole, mega lieb gsi u het üs dehei abglade u zeigt womer schlafe, hei es zimmer gha metere matratze am bode, wär gloub schösch eres büro u hei gd chöne dusche u afo Znacht choche u s’Internet hemer o dörfe bruche :) Si isch er zwüschezit ire Ma ga hole u de hemer zöme Znacht gässe, si hei no es Dessert gä u de ab ga dusche u de Tod mied is Bett gheit. Isch es ächt liebs jungs pärli gsi :)

14.3.13: Vo etz a hets gheisse friech ufstoh, die 5tägigi Tasmaniatour het drum agfange :) Si hei üs e Zmorgeshake gmacht u de i d’Stadt füre brocht womer hei miesse warte ufe Tourbus. Si ca. 18 Lütlis gsi u e meega junge Guide, lustige Typ gsi^^ Ou Gruppe isch ächt cool gsi, lütlis chli vo überau. De hemer zersch e chline Lauf zumne Wasserfau gmacht, de simer zumne bekannte See u dert chli gloffe, leider ischs zemli chaut gsi u bewöukt. De hemer bimne chline Örtli Lunch gha. De simer bimne chline Fluss gloffe u de zum Nelson Wasserfau womer o e chline Louf gha hei. Inere chline chline Stadt (Queenstown) hemer z’ässe chöne choufe u hemer g’Stopt bimne See (Queenstown mine, oder so) u de ischs ab is Backpacker YHA simer gsi. De hets es BBQ gä u hei no chli quatscht u de ischs scho ab is Bettli. Immerno mied gsi voder Nacht bevor!

15.3.13: Am 7ni hets Zmorge gä u de ischs ab weder mou zumne chline Wasserfau u de ischs witer zum grösste Wasserfau vo Tasmania. Dert hani gloub scho es Problem met mine Schue gha, ha so böuigi Dosebach Schueu gha wo s’ganze Wasser inecho isch -.- Isch dert o e lengeri wanderig gsi u am Schluss isch e Hängebrüg gsi wome schön ufe Wasserfau het chöne luege :) Womer de dobe acho si hets Lunch gä u de ischs ab ga Sandboarde oder bessergseit Sandschlittle^^ De ischs ab is Backpacker ga dusche u de simer zumne Theaterstück wo ca. 1 ½ Stund gange isch, isch no luschtig gsi nur hani öpe d’höufti nid verstande^^ Aber es hei viu vo üsere Gruppe füre miesse u chli metspele, dasch luschtig gsi^^ Nach däm simer no schnäu e Blick ufne Strand ga wärfe u de ischs ab ga Pasta choche (what else) u de hemer no wäg dr GOR miesse witerluege! U de ab i d’häia.

16.3.13: Soo hüt no ender Zmorge , 6i. Denn ca. 2h Autofahrt zude Cradle Mountain u de hets gheisse ca. 5h wandere. Es wär meega schön gsi u am Afang hets o no schön usgseh aber nächär ischs schrecklich worde bsunders weme o nid mit Rägehose u guete Schue isch usgrüschtet gsi^^ Zum glück hani scho Schue vonere Dütsche chöne uslehne da mini ja scho Tod si gsi! Hei ömu e schöni Ussecht dobe gha aber isch e Horrortrip gsi, eifach Arschchaut u Pflutschnass bis uf d’Unterhose u me isch eifach nur no froh gsi wome dunge isch acho u d’rochni Chleider het chöne alegge :) Mer heis ömu gschafft ned wie die anderi Gruppe, die si öpis ga drinke ebe us wättergründ^^ Isch zwar i däm Momänt nid schön gsi aber im Nachhinein chame säge mir si dobe gsi. Wo de aui heil dunge acho si simer ca. 1h gfahre u hei e Kaffipause imne chline Städtli gmacht wo ou no bekannt isch das a viune Wänd so malereie het, het no cool usgseh aber hami nur gfröit ufne warme Kaffii ;) De ischs nomou 1h gange u de simer im Lannceston Backpacker acho womer zersch mou si ga dusche u üsi nasse chleider ufghänkt hei^^ De isch weder säuber für’s Znacht zueständig gsi, da mer chli spot drann si gsi met dusche uso u eigentli no metere andere abgmacht hätte ischs si haut scho ga poschte de hei d’Celine u e für üs poschtet u o no schnäu es Bierli ghout für üs u de hets wie immer feini Pasta gä u es Bierli derzue u de hemer no d’Celine droffe wo o in Byron Bay i d’schueu isch^^ Aber ha die scho immer ned meega möge, hemer nur schnäu gredt u that’s it. De simer scho so mied gsi dasmer nur no schnäu abgwäsche hei u de scho langsam rechtig Bett gange!

17.3.13: 6.30 hets Zmorge gä u de ischs wedermou zumne Wasserfau, ca. 1-2h gfahre u de simer inere Cheesefactory acho, es het eifach vou usgseh wie ider Schwiz, ungloublech! Sit höt hemer o no paar anderi ir Gruppe gha u paar hei üs o verloh! Si o es paar Schwizer derzue cho^^ Ha erwartet dasme cha luege wieme Chäs macht uso aber me het mou chöne Chäs teste u säubergmachts Glace u das ha ig gmacht, es Glace gno u das ufder Terasse ir Sunne gnosse, ha Chäs e ou ned gärn eso^^ De simer so zumne Hafe gfahre womer Z’Mittag gässe hei u d’Celine u ig hei no chli ufem Tisch pennt^^ u eine het die Scheiss Tube gfieteret u de si logischerwis am Schluss eifach huere viu dert gsi XD De ischs witer zumne Strand wos aues so grossi Stei gha het wo so rötlich si gsi u het über die chöne loufe u eifach s’Meer chli beobachte :) De hemer wedermou eis vo üsne Gspräch über Manne gha u de isch dr Guide no zu üs cho u de hemerne chli über sis läbe gfragt, isch eigentli no cool mou so e Guide si aber de hetme eifach o ke zit me für family u friends da me immer unterwägs isch u gloub das chönti nid aber isch e cooli Typ gsi obwouers bi jeder Frou chli probiert het, hets zumindest ned übertrebe^^ De hemer no e Stop bemne Strand gmacht wos so zwüsche de Stei vou ufegsprützt het u der eint isch äxtra drunger u natürli pflutsch nass gsi nächär^^ De ischs los is Backpacker u de hemer e chline walk zumne Lookout gmacht isch no cool gsi :) De ischs zrüg ga choche, chli fium gluegt, duschet u de scho weder ab is Bettli!

18.3.13: 6i Zmorge, de chli gfahre u de simer zum Mountain Amos cho, ca. 3h gwanderet u zwar hardcore. Aues über so Stei wo rächt gschleferig si gsi aber het cool usgseh u es hetsech ou glohnt, het nämli e meega schöni Usecht gha z’oberst, überne Strand mit vou schönem Wasser. Abecho simer zum Glück de o no heil obwoumer üs zersch verloffe hei das ebe ke typische wäg het gha aber isch no cool gsi u hei ou meega schöns wätter gha :) Si hei o gäng wetzli über mini schue gmacht wöui ou einisch plasticsäck dri agleit ha wöusi no so nass si gsi^^ u da bim Amos si mini Schrott Dosebach schue ächt guet gsi dasi nid so grütscht hei. Aber sobaud Wasser uf dene Stei isch gsi bisch eifach uf d’Frässe gheit wenn ned ufpasst hesch. De simer ca. 1-2h gfahre u hei imne chline Dorf Lunch gha. I hamer e Meetpie kouft wöui gloub nütme derbi gha ha, de beni zu dere Brüg füregloffe wo no schön set si aber s’ganze Dorf isch nid meega speziell gsi^^ Natürli isch das der fausch wäg gsi, de beni desi rechtig u dert isch de dä Beck gsi. Dr Adam (Guide) isch o gd dene gsi, dubuuu ^^ De ischs witer ine Zoo, ire Stund simer de öpe acho, ei Zoo me am Schluss hani Zoo’s nüm chöne gse^^ Bis am 5i simer öbe dert gsi u hei o no Fuetter becho für Kangaroo, isch no luschtig gsi u ha endli e Wombat gse <3 Dasch mis Ziel gsi obwous natürli no cooler gsi wär eine wöud gse u e Tasmania Devil hemer dert o no gse u die Kangaroo si huere ahänglich gsi wägem Fuetter, eis riise Kangaroo isch bim eint vou ufegstande u eis het no es meega chlises Jungs gha u eis es reesigs wo nur s’Bei so usem Bütu gluegt het^^ U die einte hei grad schnäu gföglet^^ De ischs zrüg rechtig Hobart womer ca. am 17.40 si acho u de hets gheisse Absched nä, vo paarne hemer no Facebook ustuschet, paari si no paar Täg länger uf dere Tour gsi u anderi si gloub o fertig gsi wie mer. De simer schnäu ga poschte fürs Znacht u de het üs dr Peter (Couchsurfing) abghout, isch e luschtige Vogu gsi^^ dä het chli es Ghetto ir hütte gha aber isch e meega liebe gsi u het üs ou aues wöue abiete u het sogar äxtra e ufblosbari Matratze gä dasmer ned ufem Sofa hei miesse penne^^ Het sones DJ Phult ir Stube gha u aues so züg u het met riise fröid üs music abglo :) De hemer zäme gässe, Wii u Bierli drunke, es Hostel buechet für in Melbourne, ga düscherle u de ab ga penne.

19.3.13: ca. am 9ni simer de mou ufgstande, gässe, chli ufgruumt, es chärtli füre absched gschrebe u de gange. De hemer probiere Stöpple das ebe scho chli wit entfährnt vom Zentrum isch gsi u es het o ke Bus gha u de hemer miesse über die ganzi schiss Brüg loufe u si fasch gstorbe mit däm Backpack -.- De simer äno noche mou acho u düre Botanic Garte gloffe u hei dert öber gfragt wie lang für is Zentrum u die hei gmeint ca. 40min.! OMG, de simer dert e Typ ga frage öber mitem Outo dert isch u uf guet Glück het dä üs is Zentrum gfahre, isch o e Guide gsi wo sone Chinatour g’führt het^^ Huere Schwein hemer weder mou gha ;) De simer dert so ines Wäschcafé ga wäsche, isch vou cool igrechtet gsi u aues jungi Hipster hei dert gschaffet^^ De hemer öpis gässe dert usse u chli d’Sunne gnosse u de simer is YHA der Backpack ga ines Chäschtli due u de het d’Celine is Spitau miesse (weiss gd nüm genau wiso) u i bi i d’Stadt ga Schue sueche^^ Da i mini Dosebach Schue furtgschosse ha! Si hätti de leider z’lang miesse warte u isch wäg däm o i d’Stadt cho u de hani violetti Vans für 50 Dollar gfunde, so geil ;) De simer dr Backpack hole u de hemer scho ufe Bus rechtig Flughafe miesse, dä han ig zum Glück no vorhär buecht. Ga itschegge u hei de gd is Flugi chöne. Ufem Wäg hani no ar Gabi aglüte da si im Whats app gschrebe het dasi in Melbourne isch aber leider sisi gd scho witergfahre ufder GOR u de hemer gseit mer louge no öbmer üs dert unterwägs einisch chöi dräffe leider hets schlussändli de doch nie klappet! De hemer scho vou Stress gha da mer üs met dr Julie und em Ali verabredet hei, das si die 2 womer GOR zäme mache. De simer gd ga itschegge, dusche u de gd use u hei die droffe. Zersch hemer no miesse öpis z’ässe choufe damer scho lang huere hunger gha hei u de hemer chli besproche wie, was, wenn, wo. Bi fasch verfrohre dusse gäge schluss! De simer weder zrüg is Backpacker u eigentli hemer dr Adrien u paar anderi vo Byron Bay no wöue dräffe aber die heisech de nüme gmäudet genau glich wie dr Jean Paul, dä het aglüte u gseit är mäudetsech de no aber nüt, Manne haut! De simer de mou gli ga penne.