4.4.13: 4.30 Ufstoooh! Hätte aui verpennt wenn üs dr Hamish
ned gweckt hät, 1 Französin het drum e ähnlichi Zit dr Flug gha u de het üs dr
Hamish a Flughafe gfahre :) U ig dubu ha vor luter stresse mis Natel drin la
legge aber has zum Glück schnäu gmerkt im Auto u bis de gd ga hole u es het üs
no glängt ^^ 6.20 isch üse Flug los u hei es Nickerli ghaute^^ Guet glandet in
Cairns hemer eifach i d’Stadt miesse u hei weder mou probiert öber frage u
tatsächlich het üs dä gd metgno, het e gd dert dure miesse u isch gschäftlech
unerwägs gsi, e nätte Typ gsi. Hemer weder mou chli gäut gspart. De simer mou
öpis z’Mittag ga choufe u hei ds gd dert am Meer bir Laguune gässe u uf
d’Jasmin gwartet! Im Norde chame ebe nid is Meer ga bade wäg de Qualle u wäg
däm heisi immer so Laguune! De hemer zersch mou chli gredet wasmer wie gse uso
u de simer zersch mou aui e Van ga bueche, hei 2 vergleche u hei üs de fürs
Spaceship entschede, es sig chli modärner u secherer as d’Weeket vans! U de hei
mer gd no miesse luege fürnes Backpacker für 2 Nächt, isch günstiger cho as
wemer dr Charre scho 1 Nacht vorhär buecht hätte wöu üse Couchsurfer hätti
huere Usserhaub gwohnt, chli kak! D’Celine u ig hei o no e Schnorchutour buecht
füre Great Barrier Reaf, d’Jasmin het ebe scho buecht aber schlussändli simer
ufem gliche Boot gsi, rächt tüür isch dä scheiss gsi! De simer ga itschegge, u
hei d’Jasmin mou verabschedet u später nomou droffe zum chli plane. Si zemli
kaputt gsi u hei schnäu es Nickerli gmacht, ha fasch nüm möge ufstoh! Um die 4i
hemer de d’Jasmin weder droffe u si zum Informationcenter chli ga Züg hole u la
informiere u de simer ine Bar no es Corona ga trinke u gd womer hei wöue ga
hets huere afo pesse! De hemer no rächt lenger miesse blibe u si de einisch mou
gsecklet! De simer schnäu is Woolis ga Pasta poschte natürli u si die is
Backpacker ga choche u heis vorem TV gnosse :) De simer ga düscherle
u met freude is Bett!
5.4.13: 6.30 hets gheisse ufstoh, no mied wöu die andere im
Zimmer hei vou krach gmacht bis am morge einisch, hei no Fium gluegt! Zum Glück
isch üses Doppubett wie imne seperate Ruum gsi eifach ke düre derzwüsche aber
isch glich no huere lut gsi. De hemer miesse ustschegge, wöu nüm dr glich Ruum
für 2 Nächt frei isch gsi! Zmörgelet u de ischs ab ga schnorchle. De ischs
ufnes grössers Schnäuboot wome zersch mou es wili usegfahre isch u zum Glück
heimer so Reisetablette gno de ischs üs ned schlächt worde, d’Jasmin hets gd
verwütscht, si het miesse bräche aber ischere nächär weder guet gange. De hemer
dert mou es wili chöne ga schnorchle u es het würkli rächt schöni Farbe gha
aber ha ehrlechgseit me erwartet. De hetme no ufs Glasboot chöne wosi eifach si
e Rundi ga dräie u chli verzöut hei u er metti hets ebe Glas gha wome is Meer
abe gse het aber natürli ned so guet. De hets Z’Mittag gä, es grosses chauts
Buffet u de ischs scho los zum 2te Stop wome metem Glasboot zersch echli isch
usegfahre u de vo dert eim gfougt isch aber me het ned viu me gseh as vorhär, e
Seestärn hani gse u schösch ähnlech wie bim erschte mou. U de ischs langsam
scho zrüg gange u hei denn no Chäs met Biskuit verteilt u nächär no Chueche. De
simer mou acho u gd no ar Promenade entlang gloffe u chli dür d’Stadt aber o
Cairns isch nid würkli reesig gsi u het nid viu gä zum ga besichtige. Zum
Schluss simer no düre Nachtmäret. De simer ga dusche u wäsche u de hetme sone Guetschin becho wie in
Byron Bay im Cheeky Monkey hetme so imne Irish Pub chöne ga paar Grecht, zum usueche, für 5Dollar ga ässe. U es Bier hets natürli o no derzue gä. Hei cooli
Lütlis könneglehrt u hei de aber schnäu zrüg miesse üsi Chleider usem Tumbler
ga nä aber leider isch scho abgschlosse gsi^^ De heimers haut am
morge de miesse usenä. De simer weder zrüg i ds Pub wöus dert sone Chrueg für
nur 7$ gä het u si denne nöime aneghockt u gäng si weder anderi Type üs cho
aspräche^^ De hemer use wöue aber mer hei gloub ned metem Bier usechöne u de
hemers gloub schnäu abeglährt u si de use u de hemer gloub nüm ine chöne, isch
huere komisch gsi das ganze^^ U d’Michaela hemer o no wöue dräffe aber die het
ned zu üs wöue u mer hei o nüm möge zu ihre ga de hemers haut losi^^ De simer
dert gloub no chli am Bode ghocket u nächär mou hei ga penne.
6.4.13: Um die 8.30 hets weder mou gheisse ufstoh u ir Nacht
isch eine äuä so bsoffe gsi daser huere lang ar fausche düre klopfet het aber
has nur so im haubschlaf metbecho. De hemer packt, kleider ghout wo zum Glück
no dert si gsi, zmörgelet u de zum Spaceship gloffe zum hole womer o d’Jasmin
droffe hei. De hemer miesse Unterschribe u hei üs dr Chare erklährt meteme
Video^^ U heis no chöne teste wöu mer beidi nonie Automat gfahre si^^ Ischmer
scho chli mulmig gsi aber isch eigentli meega easy gsi met Automat. U de ischs
endli ab uf d’Strass, zersch isch se gfahre. Zersch simer so ines Hippiedörfli
namens Kuranda oder so u öbe 10min. enfährnt vo dert simer no sone Wasserfau ga
luege. Vo dert ischs de witer rechtig sones Cap, hei sone Miniatür Fähri miesse
nä u de ischme vou dürne d’schungu gfahre wos es zitli obe düre o ganz
zuegwachse isch gsi aso wienes Baumtunäu u meega viu Moskitos hets gha aber es
het guet usgseh. Vorhär simer aues ar Küschte entlang gfahre, het vou schön
usgseh, wür säge sogar schöner as GOR! De hemer e Campingplatz gsuecht u hei de
eine gfunde, hei aber nume für 2 zaut wöu eigentli hemer gar nie ufe Camping
wöue aber das isch fasch unmöglech! De hemer Pasta kochet i sore Chuchi dusse u
denn ischs ab ga penne, hei s’Bett zersch fasch nid ane brocht aber isch de
gange. Guet Nacht in the Jungle^^
7.4.13: Am 8ti beni de mou ufgstande wöu schliesslich simer
ou friech ga penne. De beni mou ga dusche u de si die andere ou mou ufgstande,
hami ou dumm gfühlt si gäng wecke u ds isch gloub dr einzig Grund wo d’Celine u
ig mou chli Buff gha hei, aso ned gschtrette aber chli Meinigsverschedeheite! Hei
aui eigentli ned schlächt gschlofe u hei de zmörgelet weder i dere schigge
Outsidechuchi^^ U de ischs los gange, i bi dra gsi met fahre u isch eigentli
rächt easy gsi hami eifach zersch no miesse umgwöhne ohni schaute aber isch viu
eifacher so :)
Erscht Stop isch bim Mason’s Hole gsi, isch sone Fluss wo imne Egge so wie e
Pool gha het, het schön usgseh u me het o chöne schwümme aber leider hei mer ja
aues vou schnäu miesse fahre u hei dahär für aues nid viu zit gha! Dert isch o
dr Cap Tribulation gsi aber si nid mou ga luege, isch chli komisch gsi^^ Aber cool
dasmer no chli ufe gfahre si. De ischs weder zrüg gange womer no bimne Strand
gstoppet hei, het schön usgseh u de ischs witer rechtig Mosman, isch o e Fluss
gsi wome o het chöne bade. De hemer no Wrap zum z’Mittag gässe wie fasch
immer^^ u de hemer dr Bus ufe gno u si dert chli umegloffe u het würkli schön
usgseh, wiene Naturbadi aber ebe leider hemer weder miesse stresse u si de haut
schoweder zrüg. Eigentli hemer bis zude Milla Milla Falls wöue aber es isch
scho dunkel worde u de hemer chli vordra nöime campet ufeme Camping Platz womer
eifach si ine gfahre u am morge meega friech o weder gange si so dasmer nüt hei
miesse zahle^^ U es het o klappt! De hemer dert üse Chocher uspackt u hei Pesto
Pasta kochet ufeme Ping Pong Tisch, logischerwis hets o wedermou pesst, hei
eigentli die ganz Wuche womer abegfahre si Päch gha metem Wätter :(
U de ischs ab ga penne.
8.4.13: Wie gseit hemer ebe friech los miesse u das hemer o
gmacht, am 6.15 simer öpe usegfahre ohni zahle :P Zersch simer zude
Milla Milla Falls, het sehr schön usgseh aber leider hets wedermou grägnet oder
bessergseit äuä gäng no! De ischs witer rechtig Mission Beach, womer de
zmörgelet hei, isch leider immernoni schöner gsi u hei wäg däm s’Wasser dert
ufder schissi kochet wöus z’fescht gluftet het^^ U dr Strand isch o nid gd
s’Highlight gsi! De ischs witer rechtig Townsville u ufem Wäg hets immer weder
Achtung Schöudli gha vom Cassowari (gseht ähnlech us wie dr Emu u isch vou
gfährlech) aber si zum Glück nie eim begägnet! In Townsville simer zersch mou ga
shoppe u de hemer ergendwo am Strasserand üse Wrap gässe u schösch hemer o nid
würkli viu gse vor Stadt u het o nid würkli schön usgseh. De ischs dr ganz Wäg
auf nach Airlie Beach womer aui eher Positiv überascht si gsi wöus no ächt
schön usgseh het, chli u chli wie Byron Bay. Touristisch haut o! De simer
zersch zumne Campingplatz chli witer usegfahre aber dert ischs o dür gsi u de
simer weder zrüg ufne Camping zmetz drin, dert hemer chöne günstiger Campe wöu
d’Jasmin dert e Tour buecht het für uf d’white Sundays ( Celine u ig hei üs
entschede ned ga). Natürli hemer weder nume 2 zaut u es hetmi o zersch gd chli
agschesse dassi glich gat wöu schösch hätme am nächscht Tag am Mittag oder so
weder chöne witer fahre wöu mer hei ja schösch scho huere stress aber etz haut!
De hemer Pasta Napoli kochet dert gd ir Backpacker chochi womer o hei chöne
bruche u hei no e Chrueg Bier teilt :) U de hets weder mou
huere afo pesse u hei rächt lang miesse warte! De hemers de mou gschafft
s’züg verrume u si no ga dusche. Um
die 11.30pm hemers de entli i Usgang gschafft u d’Jasmin isch ga penne dasi ja
uf Tour isch am nächscht Tag. Zersch simer ines Pub u dert simer so uf
Barhocker ghocket u het vou ned viu lüt gha aber mer si üs vorcho wie
Speeddating, immer weder e andere Typ bi üs gstande aber isch luschtig gsi^^
De simer mit 2 komische Type mitgange ine Club wo sozäge lähr isch gsi. Dert simer de nüm würkli lang blibe... Um die 3
hemers de is Bettli gschafft, isch e komische aber glich luschtige abe gsi^^
9.4.13: Um die 9ni beni de scho verwachet -.- wöus so heiss
isch gsi, de beni mou ga dusche u ha de d’Celine gweckt wöui so hunger ha gha u
si het natürli ned so fröid gha. De hemer gmietlich z’mörgelet u si zersch mou
is x travel ga frage öb ar Jasmin eres Portemonnaie dert isch wöusis geschter
verlore het! Aber si ischs säuber scho ga hole u hets zum Glück weder! Aber
chli kak dasis üs ned gschrebe het aber schiins ischs nid gange wägem Empfang. De
simer rächt lang i däm huere x travel gsi u hei gd no dr Bus nach Byron u zrüg
buechet u es Backpacker in Byron u wäg Thailand hemer o no gluegt u chli
gfragt, si het üs no gueti Tipps gä. De hemers endli mou dert use gschafft u di
zersch mou zum Outo ga ässe. De beni ga gäut abhebe, het zum Glück weder druffe
gha wöu geschter beni Pleite gsi. De simer chli dür Airlie Beach gloffe, am
Strand u isch natürli ned so gross gsi u het ned würkli viu gseh, de simer weder
zrüg ga dusche u hei uf d’Jasmin gwartet u de ischsi o scho cho u isch no
schnäu ga dusche. Es hetere gfaue aber es hetse o nid gd u huere überzügt wöu
s’Wätter o shit isch gsi aber schösch wärs äuä scho huere schön. De ischs los
rechtig McKay aber leider nur ca. 2h da scho 17.30 isch gsi. Natürli ben ig
gfahre da si müed isch gsi aber ig eigentli o huere u schlussändli simer ufeme
Camper glandet, haub Stund enfährnt vo Mackay u hei 25$ miesse zahle wöu dä
huere möngu isch gd ufgsprunge womer ine gfahre gsi u isch im nüt usse gsi, zum
Glück hemers no chli chöne abemärte da mer gseit hei mer gö am morge huere
friech weder! De hemer nur schnäu öpis gässe, hei nüm möge choche u um die
8.30pm simer aui scho tod kaputt im Bett gläge.
10.4.13: 6i simer ufgstande, i ha natürli die Schlafmützene
weder miesse wecke. Zmörgelet u um die 7.30 ischs de los, bis am 12i simer gäng
nur im Outo ghocket u gfahre, gfahre, gfahre! De simer in Rockhampton acho, si
ga ässe shoppe, tanke u de witer gfahre das dert nid viu zum gseh gä het! Nur
chli ar Promenade entlang simer gloffe aber isch ou wedermou hässlich Wätter
gsi u de hani wöue parkiere u dert chame nur dr Fahrer rechtig ei site parke^^
De beni witer gfahre u hei dr wäg uf d’Autobahn gsuecht u heis de
schlussändlich gfunde^^ De simer zumne Camping cho aber es isch üs z’dür gsi u
si chli witer gfahre u si de ufne Raststätte cho. Dert hemer de Gratis chöne si.
Hei bimne sone Tisch üsi Pasta kochet u de ischs scho langsam rechtig Bett am
8.20pm^^ Me het o nütme chöne mache das scho dunkel isch gsi u mer ned viu
Liecht gha hei! U si e o scho müed gsi. Guets Nächtli
11.4.13: Um die 7.30 simer de mou uf obwoumer scho um die
7ni uf hei wöue aber i ha langsam gnue gha die gäng wecke aber maches etz no
wöu es si ja nur no 2 Nächt im Van. Mi Rügge isch langsam vou am stärbe ou vo
däm ständige hocke dr ganz Tag im Outo! De ischs witer rechtig Harbaybay oder
so womer e Rundi ar Küste entlang gfahre si u bimne Strand hemer schnäu ghaute
wo nüt speziells isch gsi u de chli witer vore simer e Steg füre u zrüg gloffe
wosi gloub friecher dert drüber Waar transportiert hei. De simer nach Noosa
gfahre u natürli hets weder vou afo pesse u wäg däm simer nur schnäu a Strand
es Foti ga mache u ga dusche dert u de no gässe bim Outo. De simer eifach chli
witer gfahre u hei e Raststätte gsuecht aber leider hets nüt gha u hei imne
Shop noche gfragt womer no schnäu Sauce poschtet hei u die hei üs zumne
Parkplatz gwese, dert simer de o ane u hei bimne Bank dert Pasta kochet u hei
üs no verewigt met drischnitze i Houztisch. S’Wätter isch weder mou hässlich
gsi u vou chaut dusse wäg däm hemer dä scheiss schnäu abgwäsche u si de ga
penne, das mou ohni das Dach womer emmer hendeufe da hei faus üs Bulle würe
fende chöntemer so schnöuer witerfahre. Üsi schoude benang hemer dert o no
endli greglet!
12.4.13: Um die 6i hets gheisse ufstoh, das mou si die
andere 2 mou zersch ufgstande nach paar mou Alarm. Nachem churze zmörgle ischs
de ab nach Brisbane, öpe 2h hemer no gha! Endli acho hemer e Parkplatz gsuecht
u ig ha gd vo Afang a gseit dömer do aber nei die andere hei gmeint witer,
naja! De simer am Schluss chli Usserhaub gsi wos o guet isch gsi was ig vo
Afang a ebe wöue ha aber hei zersch no dür d’Stadt miesse fahre! De hemer dr
Bus für i d’Stadt gno u d’Celine isch de ihres Visa ga hole u gloub weder zum
Arzt. D’Jasmin u e hei zersch mou es kaffi gno u e muffin gnosse vom 7eleven,
mim guet kolleg^^ De hemer lang über Usböudige u Reise gschnurret. De hemers
mou uf gschafft u si de mou i d’Lädelistrass, zersch gd mou i Souvenirshop woni
aui Souvenir kouft ha u de heisi gd Spongebob vortreit mit so riise Plüschfigure^^
De beni mis Bankchärtli ga kündige u de simer is Woolis, de het o scho d’Celine
aglüte dasi fertig isch u hei de uf se gwartet dasmer de zäme chö öpis ga ässe
hole! De isch si o no uf Bank u ds isch eewgis gange wöu haut o gd Mittag isch
gsi u de hemer es Hüehnli mit Pommes im Woolis ghout :) mmmmh! Mou weder öpis
anders z’ässe ;) De hemer üs sozäge trennt, wöu d’Jasmin het ned wöue shoppe!
De isch si chli dür d’Stadt u het gloub nöime Buech gläse u d’Celine u eg hei
würkli Hardcore shopping gmacht bis am abe, bi tod gsi^^ U gäut hani o ke meh
gha! Um die 7ni hemer üs de aui weder droffe u si no ga Brötli fürs Zmorge ga
hole u schösch no öpis poschtet u hei de dr Bus weder zrüg gno. De hemer s’Outo
ine anderi, chli meh abglägeni Sitestrass parkiert u dert gässe u de pennt. Hei
eifach ds Dach hende use weder ned ufghänkt das ja schösch meega uffäuig gsi
wär! Dert hemer no so hässlichi fetti Rattene gse^^ U hei meega lang brucht
besech mou öber usem Auto bewegt het u öpis gmacht het wöu eifach niemer
motiviert isch gsi, zum Schluss hemers de um die 10ni doch no is Bett gschafft.
Good night, for the last time in the car.
Keine Kommentare:
Kommentar veröffentlichen